Es sait dr Kain emol zem Abel
Du, jetzt git's e Durm zu Babel.
Nai sait em hässig do dr Kain
in Basel baue sy jetzt ain!
Das gäb dert schynt's e Mäuseturm
und vo dr Hechi wird's dr sturm,
wohrschynlig het – bevor er roschtet –
dä e huffe Myysli koschtet.
Nai, Mässeturm duet sälle haisse
vo dert kasch denn uf d' Herbstmäss gnaisse,
de sehsch dert vorne und dert hinde
d' Bahne als wie meh verschwinde
vo ainer Bude bis zer andere
muesch bald e Kilometer wandere,
was gsi isch uf em Rosetal
findsch im Kasernenareal.
D' Haltstelle vo dr BVB
haisse au nimm so wie eh'.
"Muschtermäss", das deent doch queer
drum sait men "Exibischen-Sqweer"
und alli Mässe sin hit laider,
halt nur no fir e baar Insider.
Alles drait sich do um 's Gäld:
It's a M(a)ess uf däre Wält!

Yystiige, platz näh, sitzed bitti
in die politisch Resslerytti:
Dr Leuebärger isch e glatte
är verkauft dr Zuggerwatte.
Git ächtsch dr Kaschber Villiger
s' Maagebrot bitz billiger?
E feyne Mogge Dirggehonig
griegsch bim Ruthli Metzler nonig.
D' Maronni kasch bim umelaufe
vo dr' Lega Ticinese kaufe,
bi däne isch jo ohnehin,
dr Wurm vo Aafang a scho drin.
Als näggschtes gsesch zem Zytvertryb
dr Sämi Schmid ohni Unterlyb.
Dä isch, wenn' s nonem Blocher goht
jo nur e halbe Bundesrot.
Au 's Ruthli kennt me dert elaige
als Dame mit drey Fiess go zaige.
D' FDP – 's isch en alte Zopf
käm ganz derthär – nur ohni Kopf.
Dä kenntsch denn vo dr Calmy-Reh
mit Blondyyne-Mèches dert gseh.
Dr Blocher zaigt men umenand:
Kai Hirni und au kai Verstand.
Dä het doch nur e Huffe Gäld:
It's a M(a)ess uf däre Wält!

Dr Hermes kunnt als Götterbote
är mecht de Mänätscher guet rote,
mecht ne hälfen us der Not,
as d' Wirtschaft wider obsi got.
Die saagen ihm, du bisch e Stümper,
nur mir im VR sin d' Olümper,
die wahre Götter, das sin mir,
und griegen au vyll Stitz derfir!
Und ligt den d' Swissair uf em Boode
duet sich nadyrlig kaine roode
es spiile dert die VR-Bängel
uf aimool alli d' Unschuldsängel
si ziehn sich z'rugg mit ihrem Gäld:
It's a M(a)ess uf däre Wält!

Dr Busch, dr Schorschli dabbel-juu
(tschuunier), duet mit syner Crew
gäge die irakisch Assle
Satan Hussein mit em Säbel rassle.
Die amerikanisch' Schiessbudefigur
grinst in d' Kameras ganz stur.
Dr Tony Blair isch um's verwurgle
au ain vo däne Krieger-Gurgle
d' Mädäm Rice und au dr Powell
mache s' Ganz kai bitzli schlauell.
Ob d' UNO mit macht, isch 'ne glych,
dr Busch sait aifach: "D' Wält bin ych,
ych lehr dr Hussein scho no mores!"
Und isch denn derten all's kapores,
schreit me scho nach Spändegäld:
It's a M(a)ess uf däre Wält!

Uf der Himalayabahn vom Läbe
blybe d Nej Yorgg Bebbies gläbe
's drait sich all's um d' Fasnachtsnaabe
's goht mol uffen und mol aabe
mol isch es dunggel, mol isch 's häll
und alles drait sich schampar schnäll.
In zwai Joor sin mir wieder do,
alli zämme, fasnachtsfroh,
(wohrschynlig hän mer nid meh Gäld):
It is a M(a)ess uf däre Wält!