Bummel

Dr Martin Grob het an der letschte GeVau die glänzendi Idee gha, mer kennte doch e Bummel ins Ussland mache - är und s'Lucienne hän sich anerbodde dä Bummel z'organisiere - so quasi d'NejYorgg Bebbi als Kultur-Boote vom Rhy, damit d'Zircher au emol ebbis rächts heere.

Noch ere wunderscheene Fasnacht und ere gheerige Portion Schloof, hän mer uns denn am Sunntig, em 11. Merz am Bahnhof SBB troffe, zer Abfahrt 07.51 h. Der Stefan (Meier) und s'Silvana hän offebar gmaint, es handli sich um e "Last Minute" Arrangement, wo me muess wörtligg näh - ebbe dryssig Sekunde vor der Abfahrt sin si grad no in Wagon yneghächtet.

Vom Zircher HB sinn mer bis zem Zolli gfahre und wär het uns dert erwartet, mit California Sun wie immer? - dr Chardonnay-Werni! Gipfeli hets au no gää und sogar d'Sunne het duredruggt - e glungene Ufftaggt zum ene (vermaintlig) herlige Daag. Im Zolli het ys e nätti jungi Dame ummegfiehrt und ys vyl verzellt. Im Affehuus hesch denn der Walti Arnold gseh strahle, wo's ghaisse het, dä mit de silbrige Hoor isch der Chef! Mer hän aber nit welle kontrolliere, ob sy bi ihm au so wyt am Rugge hinten aabe gehn....

Laider hets denn gly zuegmacht und aagfange rägne. Mer hän gwisst, wenn mir am Uusgang mien sy, aber s'Erika und dr David hän no welle e weeneli Versteggis spiile. Während e paar vo uns bim Schlange- und Vogel-Huus uff der aine Syte ynegange sin go si sueche, sin si uff der andere Syte uusegschlupft - etsch-betsch...

Mit em Bus sin mer denn uff d "Chäsalp" in d Wirtschaft "Zum alten Tobelhof". S'isch punkt zwelfi gsi, also High Noon, aber anstatt dr Gary Cooper het uns dert dr Peter Warschawski mit em Rosemary, em Evi und em Benny erwartet. Im ene nätte Sääli isch uns denn e rychhaltigs und guets Aesse serviert worde. So vo Gang zue Gang het me gar nit realisiert, wie schnäll d'Zyt lauft. Es isch ämel scho vieri gsi, wo mer uffbroche sin. Zrugg zer Bus-Haltstell und vo dert bis zum Bahnhof Stettbach, wo mer d' S3 gnoh hän zum Bahnhof Stadelhoofe.

Obwohl 's laider die ganz Zyt gsch...... het, sin mer unverzaagt ins Niederdorf gloffe. Ungfähr in der Mitti hän den die vom Spiil d'Drummle aagschnallt und d'Piccolo zämmegsetzt. Mer sin alli ygstande und denn Richtig HB abmarschiert. Am halber säggsi sin mer dert wortwertligg wie begosseni Puudel aakoo. D "Feschtspiil"" hän derno im Bahnhof dr Schlusspunkt gsetzt (es het scho gewaltig teent in däre Halle.....).

Die wo in der Gegend wohne oder mit em Auto koo sin, hän sich verabschiidet und die andere sin uff der Säggsi-Zug nach Basel. Dr Benny het sich während der Fahrt gly d Kopfheerer aagschnallt, d Nootebletter in d'Hand gnoo und fir sy näggschte Ufftritt proobt. Er isch so im Elemänt gsi, dass nit vyl gfählt hätt und mir wäre no in Gnuss von ere herligge Arie koo.

Z'Basel uf em Perron het sich d'Gruppe erneit tailt, die maischte sin haim gange und e glaine Kärn vo zirka acht Bebbine und Bebbis isch no rasch ins Büffet ygloffe. Bim ene Bierli isch der Daag denn definitiv uusplämperlet und gly hän sich au die letschte Ziiri-Pilger uff e Haimwäg gmacht.

S'isch trotz em nasse Wätter e glatte Daag gsii.

Danggerscheen, Martin und Lucienne .......

dr Schryberling. BEAT

__________________

PROTOKOLL DES POLIZEIDEPARTEMENTS DER STADT ZÜRICH

Herrn Martin Grob wird zuhanden der Basler Fasnachtsclique "Bebbi-Club New York" bewilligt einen Fasnachtsbummel mit ca. 16 Guggen-musikern und 10 Begleitpersonen durchzuführen.

. . . . . . . . . .

Das Sammeln von Geld durch Herumbieten von Sammelbüchsen oder Sammeltüchem ist verboten.

Propaganda durch mitgeführte Plakate, Transparente und dergleichen ist untersagt.

. . . . . . . . . .

Für allfällige Schäden an öffentlichem/ privatem Eigentum haftet die bewilligungsinhabende Person in vollem Umfang (OR Artikel 41 ff.).

Für die ordnungsgemässe Durchführung muss Herr Martin Grob einen eigenen Ordnungsdienst organisieren, der einen geordneten Ablauf der Veranstaltung gewährleistet.

. . . . . . . . . .