Wo mr am zwelfi z'mittag im Hotel Basel uffgwacht sin und uusegluegt hän,  het is d'Sunne heerlig entgegegschiine.  Isch das e Fraid gsi!   Mr hän is derno am Äscheplatz by dr Credit Suisse troffe.   Jetzt het d'Ladärne vo usse belychtet uff e ganz andery Wys wunderscheen ussgsee.  Me het sich begriesst,  Familie und Frind sin ko,  zum is biglaite und biwundere.

Und do isch au dr Beat Wild ruehig und beschaide in Zivyl gschtande und het alli und alles liebevoll aagluegt.  Är und sy Christine sin d'Seel vo dääre Glygge.  Si sin wie dr Babbe und d'Mamme, wo sich still und ohni grooss Gedue und Fääderläsis mit Liebi und Hiigoob aifach um alles kimmere und luege, dass alles lauft, dass es allne guet goht, alli zfriide sin und alli e Fraid hän.  Vylmool merssi fir alles,  wo Dir zwai fir uns machet.

Und do stoot au dr Agi in sym Prachtsgoschdym.  Mir andere, Gweenlige, sin alli glaini Mysli gsi,  wo am Schwyzerkäs gnabbere, die amerikanisch Fahne isch dr Hintergrund und die gääli käs-verlechereti Jagge draage mr oobedruff.  Dr Kopf isch ebbe-n-e härzigi Muus.  Aber dr Agi will nyt mit Mys z'due ha - Na-naaaai!!  Är het sich sy aige Goschdym kreiert und het sich zur Oberkueh erkoore (wenigschtens undeduure),  wo all die Milch spändet,  wo schliesslig zue däm lecherige Käs fiehrt.  Aber dass es joo au sicher kai Missverständnis git, und dass es au im letschte Simpel stärneglaar isch,  dass er e Maa isch,  het er's nit welle bi dr Kueh bewände losse, sondere er het sich e Muni-Kopf gmacht.  Und was fir e scheene,  mit Bliemli druff.  He jo, es heisst jo: "Dr Muni muess e Maie ha!".  Er isch wirgglig e Kinschtler.

Und jetzt schreit die Muuni-Kueh wider: "Yschtoo!"  und loos simmer zooge bym heerligschte Wätter, dr Steinebärg durab am Comite verby, iber e Barfi und dr Märtplatz, am Roothuus vrby und iber die Mittleri Brugg zum erschte Halt bym Kaffi Spitz.

Und doo hämmer e ganz e feine, lange Halt ygleggt:  mr hän nämlig derfe bym Willi und bym Cécile nit nur ihri feine kulinarische Spezialideete go gniesse, sondere-n-au ihri scheeni Woonig und ihri liebi Gaschtfrindschaft und Wermi.  Isch das e Fraid gsi!  Uffdeggt isch gsi - e ganz Byffee mit vyle Heerligkaite - nadyrlig au mit de beriehmte Frikadelle - und mit eme guete Drepfli.  Es isch uurgmietlig gsi.  Mänggi sin uff em Balkon gstande und hän em Cortege zuegluegt.  Anderi sin aifach umme-gstande-n-und ummegsässe, hän s'Ässe und s'Dringge und d'Gspreech mit de Glyggefrind gnosse.  Im Willi und im Cécile gheert e ganz e grooss Danggerscheen fir ihri Schenerosideet.  Als Ussdrugg vo däre Danggbarkait het dr Don Alfredo ins Geschtebuech ains vo syne beriemte, exquisite Värsli brinzlet, und dr Benny het mit synere scheene Heldetenorstimm fir s' Cécile und dr Willi e Canzone gsunge dass d'Wänd numme-n-eso zitteret hän.      Salli Willi und Cécile - bis s'näggscht Mool wider!

Dasch aber nit s'ainzig gsi, wo mi griehrt het, wenn y d'Dambuure vo hinde gsee ha.  Do isch nämlig das unvergässlig Bild vomene glaine Keerperli mit stramme Bainli und feschte Schue,  wo mit em lingge Bai däm schwäre Kiibel immer wider e Buff git,  ai Schritt noo-n-em andere,  und wo mit de glaine,  aber stargge Ärm ruesst und ruesst und ruesst und wo mit de Groosse guet mitkunnt.  S'Bianca Back isch au e Wunder!   Ruehig, dapfer und sälig!  Und s'ruesst und ruesst und ruesst.  Ruess wyter eso, Bianca.  Mr fraie-n-is, wie De vo Johr zue Johr greesser wirsch und mit unsere Dambuuremaischter, em Stefan Meier und em Lukas Benkler und derno mit em Benny und em David, kasch voll jede Marsch anepfitze und sälber Maischtere bisch.

Und jeeggerli,  isch das nit e Bild:  dr David Pear,  unsere Connecticut Yänggi,  mit syne roote Durnschlabbe, wo hinde-n-und vorne mit Basel nyt am Huet het und aifach uss Liebi und Bigaischterig s'Basler Drummle glehrt het und kunnt und bebberlet und bebberlet.   S'isch doch e riehrend Bild.

Jä und s'Liviana mit sym digge Buuch, wo au dapfer die ganz Route gwatschlet isch!  Dasch e Laischtig gsi und ych bi sicher, dass das Buschi e ganz e groosse Fasnächtler wird (mr winsche-n-irn Liviana und im Lukas scho jetzt alles Gueti zue däm groosse-n-Eraignis).  Emool macht denn das glaine Benklerli au mit,  grad eso wie die Binggis,  wo das Mool eso härzig derby gsi sin:  s'Bettina  und  dr Gregor Mössinger  und  dr glainscht, dr nuggisch Basil Suter.  S'Anja Back isch nadyrlig kai Binggis mee,  sondere-n-e jung Frailain und het als Solo-Jungi Garde ganz fein mitpfiffe.

Noo-m-ene Schliggli Wysse und eme Sygarettli simmer derno wyter iber d Wettstaibrugg - wider am Comite verby, wo sich vor luter Verbeigige fascht e Häxeschuss ghoolt het - und hän d'Ladärne-n-uff e Minschterplatz pfiffe,  wo si stolz näbe-n-ihre Schweschdere,  de-n-andere Ladärne,  dä scheen Platz mit em Minschter im Hintergrund belychtet het.  Me-n-isch gschtande und het die Kunscht bewunderet und die Bracht gnosse.   So vyl Kreativiteet,  so vyl Arbet,  sovyl Higoob,  so vyl Zyt und  soo vyl Liebi - au das isch e Wunder!

E kurze Baizebsuech und nonemool e Mählsuppe und e Ziibelewaie het is gnueg gwermt und gschterggt zum Yschtoo und Abmarschiere an Gämsbärg,  wo mr im Laiezorn z'Nacht gässe hän.  Es isch fein warm, gmietlig und luschtig gsi.  Vyle Dangg, liebi Caroline,  fir die ganzi Ässe-n-Organisation.  Dasch nit eso aifach,  bis jede het,  was er will!   De hesch es mit vyl Fyngfyl gmacht (au Dy Piccolospiil isch mr e-n-lnschbiration - dangg Dr!)    In däm ganze Rummel het s'Servierpersonal sy Humor nie verloore, und das isch z'bewundere.  Es isch au e Bangg ko singe - er isch rächt gsi, wie me-n-eso sait!

Noo däre keerperlige-n-Erhoolig simmer wider uff d'Gass zum - fir mi - heerligschte Dail vo dr Fasnacht:  zum Gässle.  Das het gruesst und jubiliert und quirlt,  und d'Zueschauer hän e Fraid ka.  E heerligi Atmosphäre isch es gsi,  und scho wider isch e Stigg sibte Himmel uff dr Ärde gsi.  Mr sinn alli mitenand ganz harmonisch dur die liebe, vertraute Gasse und Gässli gschwäbt.  Und dass es harmonisch isch,  isch e-n-Uuszaichnig vo-n-ere Glygge und s Verdienscht vo ganz vyle.   Mr hän jo in unserer Glygge - aifach will si so zärnmegwirflet isch - alli Stueffe vo Kenne:  vom Pfyffer- und Drummelmaischter bis zum Bebberler und Pfyffer mit eme Ton-Durchschnittsträffer vo 66.6%  -  aber was macht's?   Mr hän's alli mitenand gnosse,  und s'näggscht Johr und s’Johr druff  kenne's alli - wo das Johr noonig Maischter gsi sin – au besser und besser.

Am ains am Morge hämmer is derno an dr Schiffländi vo-n-enand verabschiidet,  in Säligkait iber dä wunderscheen Fasnachtsmäntig und in Vorfraid uff dr Zyschtig.  Und ganz zletscht het me-n-e glai Ziigli gsee ibere Märtplatz gege s'Hotel Basel laufe:  s'Rosemary und s'Gini und s'Evi als Vordraab und dr Benny und mi als Dambuur und Pfyffer.   Dr Arabi und dr Gluggsi und dr Saggodo hän is grad bis ans Hotel Basel brocht - und säälig simmer ins Bett gfalle,  in Draum vo däm Draumdaag.

Aadie Fasnachtsmäntig,  aadie liebi Nej Yorgg Bebbi-Frind - s'näggscht Joor wider!

                                                                     Peter Warschawski