Uns Nej Yorgg Bebbis gits — dasch wohr
in däm Johr gnau sit zwanzig Johr,
e Jubeljohr — normalerwys –
doch nid fir uns, uns goht's ganz mys.
Mir schrumpfe, so wie uns'ri Stadt
und finde baides gar nid glatt.
In uns'rer Clique, wirsch es gseh,
hets bald kai Am'rikaner meh,
und au in Basel, derfsch nid flueche,
muesch d'Bebbi mit der Lupe sueche.
Sogar 's Quartier bim Dalbedych
syg bitten aifach nimmi 's glych.
E multikulturelli Metropole
sin mir vo Schaitel bis zer Sohle;
so kämte mir denn nundefahne
bald au an dr Big Apple ahne.
Doch korrigiert dr Hanspi Platz
und schrybt's preziis au in dr BAZ:
«Los Bebbi, mach mer kai Radau,
Basel schrumpft» (mir laider au).

Au z' USA, in Washington
schrumpft ebbis, dasch dr gueti Ton.
Im Internet hesch gseh mit Gruuse
wie als dr Bill het kenne schmuuse.
Dä sagi schynts mit Hochgenuss:
«Monica, dr Schuss isch duss . . .»
Zwar stryttefs ab är bis zem Änd
und so ain isch no Presidänt!
Um si Impeachment z'unterwandre
mach dä ai Fahler non em andre.
Was wott dä Duubel duurestiere,
as är im Irak Grieg duet fiehre?
Amerika ych nimmi trau:
Dr Aastand schrumpft — und d'Wohret au!

Was au fescht schrumpft, dasch allerhand,
em Christo nämmlig sy Verstand.
Sunsch hätte doch die dumme Sieche
d'Baim nonig uspaggt dert in Rieche.
Was dä do abgit als Begrindig
isch fadeschynig und ganz windig,
denn haut är's ab mit syner Frau
und Rieche schrumpft — mir laider au.
In Basel schrumpft, 's lost kaine kalt,
im Woghof grad e Staatsawalt.
Dä mues sogar ufs Land in d' Kischte
und mit ihm no bar Polizischte.
Jetzt fiehrt dr Coop, oh jemineh,
ab sofort kai Landjeger meh!
Und jede Schugger mechti jetze
sich no Höllste lo versetze.
So schrumpft in Basel, s' isch kai Hit,
d' Justiz — d' Verbrächer laider nid.

Im Joggeli ka jede gseh
schuttet jetzt e kaine meh;
dr FCB, das isch fascht z'vyl,
wählt d' Schitzematte als Exil
ych hoff nur, as mir's wärde gniesse,
wenn die dert ihri Gol dien schiesse
sunsch schrumpfe schnäll, das isch kai Witz,
die neetige Sponsore-Stitz.
So isch es uf dr ganze Wält
niemet‘s git no gärn sy Gäld
und au em Fasnachts Comite
duet s' Subwenzione zahle weh.
Mir hoffe, 's ligt no ebbis drin,
au wenn mer fescht am Schrumpfe sin.

Was au schrumpft sin d' Chemie und d' Bangge,
wärn hesch da Schyssdrägg wohl z'verdangge?
Als Bänggler muesch am morge frieh
no Ziri fahre, nundedie!
Gleis siibe, Basel SBB
kasch dr Brain Train fahre gseh,
und zoobe nimmsch in Ziiri denne
dr Brain Drain fir dehaim go z'penne.
Jetzt will me's schynts no so wyt bringe
as d'Schnitzelbänggler z'Ziiri singe!
Und denn im Niederdorf dien sumpfe —
so wurd jo uns'ri Fasnacht schrumpfe!

Was wird drgäge untemoh?
Bebi, jetzt haisst's zämmestoh!
Kejet z'erscht, bevor's isch z'spot
d'Schrumpfkepf us em Grosse Rot.
Denn muess d'Regierig zämme sitze
und Basel vor em Schrumpfe schitze.
Mir sin in zwai Johr wieder do
und luege, wie's isch uuse ko,
mir hoffe, Basel dät's preschtiere
und mir dien wyter existiere!